Eusko Jaurlaritzak ontzat eman du Haurren eta Nerabeen Legearen aurreproiektua, eta aurrera egingo du adingabeak eskubideen titular gisa aitortzean, eta ez soilik babesa merezi dutela aitortzean. Beatriz Artolazabal Berdintasun, Justizia eta Gizarte Politiketako Sailburuak zehaztu duenez, Eusko Legebiltzarrean izapidetu eta onartu ondoren, legeak beharrezko baldintzak ezartzea bultzatu eta sustatuko du, adingabe guztiek giza eskubide eta askatasun guztiak berdintasun-baldintzetan baliatu eta goza ditzaten ziurtatzeko eta babesteko; bereziki, edozein jokabide edo indarkeria-moduren aurrean, eta familia-, gizarte- edo hezkuntza-ingurunea edozein dela ere.
Lege berriaren jatorria Haurrak eta Nerabeak Zaintzeko eta Babesteko 2005eko Legea da. Ezarri nahi den lege-esparru berriak urrats erabakigarria emango du gaur egun indarrean dagoen haurrak eta nerabeak zaintzeko eta babesteko euskal ordenamendu juridikoa nazioarteko esparruetara egokitzeko (Haurren Eskubideei buruzko Konbentzioa), Europako (Europar Batasuneko Tratatuak eta Europako Kontseiluaren Hitzarmenak) eta estatuko esparruetara egokitzeko.